ദുബൈയില്‍ വാഴകൃഷി പരീക്ഷിക്കാന്‍ മലയാളി യുവാവ്
സ്വന്തം ലേഖകന്‍
ദുബൈ: കേരളക്കരയില്‍ പരീക്ഷിച്ചു വിജയിച്ച വാഴക്കൃഷി മലയാളി യുവാവിന്റെ പരിശ്രമത്താല്‍ കടല്‍ കടന്നു ദുബൈ നഗരത്തിലും സജീവമാകുന്നു. പത്തനംതിട്ട ജില്ലയിലെ നാരങ്ങാനം പ്രശാന്തി ഭവനില്‍ രഞ്ജിത്(26) ആണ് വാഴയുടെ പേരും പെരുമയും ഇന്ത്യയുടെ അതിര്‍ത്തി കടത്തിയത്.
തന്റെ സ്വദേശമായ നാരങ്ങാനത്ത് വാഴക്കൃഷി പരീക്ഷിച്ചു വിജയം കണ്ടതിനേ തുടര്‍ന്നാണ് വിദേശത്തും വാഴക്കൃഷിയില്‍ ഒരുകൈ നോക്കാന്‍ രഞ്ജിത്ത് തുനിഞ്ഞിറങ്ങിയത്. അദ്യഘട്ടമെന്ന നിലയില്‍ അടുത്തിടെ അവധിക്കു നാട്ടില്‍വന്നു മടങ്ങിയപ്പോള്‍ കുറേ എത്തവാഴ വിത്തുകളുമായാണ് ഈ യുവാവ് ദുബൈയിലെത്തിയത്. വിവാഹം കഴിക്കണമെന്ന മോഹവുമായാണ് നാട്ടിലെത്തിയതെങ്കിലും പ്രതീക്ഷകള്‍ അസ്തമിച്ചതിനാല്‍ വാഴകൃഷിയില്‍ ശ്രദ്ധ കേന്ദ്രീകരിക്കുകയായിരുന്നു. ജോലിക്കിടെ വീണുകിട്ടുന്ന ഒഴിവുവേളകളാണ് രഞ്ജിത് വാഴകൃഷി പരിപാലനത്തിനു തിരഞ്ഞെടുക്കുന്നത്. വാഴ പരിപാലനത്തില്‍ രഞ്ജിത്തിനുള്ള പ്രാഗല്‍ഭ്യം വാഴകൃഷിയിലും പ്രകടമായിട്ടുണ്ട്. ഏകദേശം ഒരാള്‍ പൊക്കത്തില്‍ പുഷ്ടിയോടെ വാഴകള്‍ വളര്‍ന്നിട്ടുണ്ട്. ദുബൈയിലെ താമസസ്ഥലത്തിനു സമീപം ദുബൈ ഷേക്കിന്റെ ഉടമസ്ഥതയിലുള്ള 25 സെന്റ് സ്ഥലം പാട്ടത്തിനെടുത്താണ് കൃഷിയിറക്കിയത്. കേരളത്തില്‍ നിന്നുമെത്തിക്കുന്ന ചാണകവും ചാരവുമാണ് വാഴയ്ക്ക് വളമായി ഉപയോഗിക്കുന്നതെന്ന് ഈ യുവാവ് പറയുന്നു. വരുംനാളുകളില്‍ പാളയംതോടന്‍, കദളി, പൂവന്‍, റോബസ്റ്റ തുടങ്ങിയ ഇനത്തിലുള്ള വാഴകളും തന്റെ തോട്ടത്തില്‍ നട്ടുവളര്‍ത്താനാണ് ഈ വാഴയുവാവിന്റെ നീക്കം. ആഗോള തലത്തില്‍ വാഴയുടെ പ്രശസ്തി പ്രചരിപ്പിക്കുന്നതിനൊപ്പം വാഴ പരിപാലനത്തില്‍ പുതിയൊരു വിപ്ലവത്തിനു തുടക്കമിടാനുമാണ് ഇയാളുടെ ലക്ഷ്യം. വിവിധ ഇനങ്ങളിലുള്ള വാഴകളെ കൂട്ടിയോചിപ്പിച്ച് സങ്കരയിനം വാഴകള്‍ കാര്‍ഷിക മേഖലയ്ക്കു സംഭാവന നടത്താനും ഇയാള്‍ പദ്ധതികള്‍ ആവിഷ്‌കരിച്ചിട്ടുണ്ട്.
ദുബൈയിലെ തന്റെ വാഴക്കൃഷി തോട്ടത്തില്‍ രഞ്ജിത്
നാരങ്ങാനത്ത് രഞ്ജിതിന്റെ ഉടമസ്ഥതയിലുള്ള വാഴത്തോപ്പിലെ ഭീമന്‍ വാഴക്കുല
